Gwlad beirdd yw yr hyglod bau,
Man iddynt rhwng mynyddau.
Gwlad Gutyn, oedd ddyn o ddoniau,—ein meistr
Ym mhob barddas ddeddfau;
Gwyr y fro hon geir i fawrhau—purdeb
Y ddoethineb a ddaeth o'i enau.
Yma y parod Wilym Peris—roes
Gerdd o ryw uchelbris;
Ac er bod ei nod yn is,
Deuodd y wlad i'w dewis.
Dyma wlad Gwilym Padarn,
Gwr a fu o gywir farn;
Molodd Dduw, a gwnaeth aml ddarn—a'i syniad
A'i gydiad yn gadarn.
A beroedd, llynnoedd, a llwyni,—a rhu
Rheieidr a geir ynddi;
Ei hochrau certh, a'i chreig hi,
Geir yn nawdd digryn iddi.
Trwy yr awyr a'r tir y rhua—twrf
Terfysg mawr y gloddfa;
Ar ruthr drwy'r creig yr a—ym mhob agen
O! clyw ei acen, a'r modd y clecia;
I'r glyn oll treiglo wna,—a hwnnw'n fedrus,
A dawn wir wawdus, a'i dynwareda.
Tan gystudd dygwyd hen gastell—Padarn,
Pwy wêd am ystafell
Owain Goch, pan yn ei gell—bu'n aros,
Er rhybudd, o achos rhaib ei ddichell.
