Gwrid y Machlud/Angel Gethsemane

← Y Nadolig Hwn

Gwrid y Machlud gan Richard Jones (Ap Alun Mabon)

Yn y Cysgod →

III
Cerddi'r Cysgodion

ANGEL GETHSEMANE

O, ANGEL Gethsemane drist,
Dy hanes sydd yn hen;
Tydi fu'n gymwynaswr Crist
Ar noson oer ddi-wên.

Ni wn dy enw, angel mwyn,
Ymhlith angylion Duw,
Ond gwn mai ti fu'n lleddfu cwyn
Gwaredwr dynol ryw.

Yn yr unigedd, Iesu'n brudd
Blygasai dan y pren,
A blodau tristwch ar ei rudd
A barrug ar ei ben.

Ei chwys yn disgyn wrth ei draed
Oddiar ei wyneb hardd;
Defnynnau lliw y cochaf waed
Ar farrug oer yr ardd.

Yn nos y gofid bryntaf du
Pob ffrind ynghwsg ond Un,
Yng Ngethsemane gwelwyd di
Yn ymyl Mab y Dyn.

Dy law osodaist dan ei ben
Yn awr y drymaf loes;
A'th wên oleuodd dywyll nen
Y ffordd i Fryn y Groes.