Hanes Eglwysi Annibynol Cymru Cyf 1/Goldcliff
| ← Jerusalem, Coed-Duon | Hanes Eglwysi Annibynol Cymru Cyf 1 gan Thomas Rees a John Thomas, Lerpwl |
Capel-y-Garn, Abercarn → |
GOLDCLIFF.
Enw plwyf bychan yw hwn ar y gwastadedd rhwng y Casnewydd a Chasgwent, a rhwng cledrffordd Deheudir Cymru a'r mor. Yn y flwyddyn 1835, adeiladwyd yma addoldy bychan i'r Annibynwyr trwy ymdrechion y llafurus David Thomas, Llanfaches. Pregethwyd ar ei agoriad gan Mr. T. Gillman, Casnewydd; D. Davies, Penywaun; a D. Davies, New Inn. Achos gwan iawn, fel llin yn mygu, sydd wedi bod yma o'r cychwyniad hyd yn awr, ac nis gellir byth ddisgwyl iddo ddyfod yn gryf, oblegid nid yw holl drigolion y plwyf ond 250 o rif; ac o'r cyfryw y mae rhai yn myned i eglwys y plwyf, ac amryw yn perthyn i gynnulleidfa fechan o Fedyddwyr yn y gymydogaeth. Dan ofal gweinidogion Llanfaches, yn benaf, yn nghyd a phregethwyr cynnorthwyol o'r Casnewydd, y mae y lle hwn wedi bod o ddechreuad yr achos hyd yn bresenol.