Marwnad Ifor a Nest

gan Dafydd ap Gwilym

Henaint anghywraint a hiraeth, - a phoen

a phenyd fal blaen saeth,

marw Ifor, nid rhagoriaeth,

marw nest, y mae Cymry'n waeth.

Maen'n waeth am dadmaeth ; mae dôr - rhof ac ef

yn gyfyng ym mlaen côr;

marw Nest, mae f'arwest yn fôr,

morwyn nef ; marw iawn Ifor.

Gorau oedd Ifor â'i gorff syth, - ein rhi,

yn rhoi Deifr ar esyth,

ar a fu, gu gwehelyth,

ar y sydd ac a fydd fyth.

Nid af byth o'm nyth gan wµd - i gerddor

a gerddodd cylch y byd;

ni chân fy neufraich ennyd,

ni chaf, ni feddaf hawdd fyd.

Hawdd fyd a gyfyd digofaint - calon,

a hiraeth i'r fron hon, a henaint.

Herwydd wylaw glaw, glas ennaint - orchest,

am Ifor a Nest, mwyfwy yw'r naint.

Hael Ddofydd, tremydd, hwyl trymaint - a'm pair,

gweled Nest ni chair, crair, gair gwyraint.

Rhaglyw afael yw, neu ofeiliaint - poen,

ceinlliw haf oroen, caen llifeiriaint,

wrth weled ciried cariad saint - am fudd,

ac anwylyd prudd a gynheiliaint,

nest wengoeth, winddoeth, wenddaint, - ac Ifor

â mwy no rhagor y'm anrhegaint.

â lluchwin o wydr y'm llochaint - ar hail,

A medd o fuail mwy ddifeiaint.

A rhuddaur a main a'm rhoddaint - bob awr,

â hebogau mawr y'm hebygaint.

Hir ddoniau i'r ddau, hwyr ydd aint - dan gŵl

i gyd i ochel 'n eu godechaint;

ac undyn ydyn' ni'm oedaint - am fudd,

ac un dadannudd am fudd fyddaint.

Llyw llygrgaer yn aer ni wnaint - yn eiddil,

anturiai nawmil mewn twrneimaint.

Llys Fasaleg deg dygaint - hawddamawr,

a gwawr ei heurllawr, lle mawr meddwaint,

lle bydd lleferydd, llifeiriaint - gwinllestr

a golau fenestr ac ael-feiniaint.

Llafnfriw, llwrw iawnwiw Llµr ennaint - Einglgrwydr,

a llew ysigfrwydr lluosogfraint.

Llorf llu, lled garu, lledw geraint - ym mro;

Llywio naf huno nef i henaint.