O! fy Iesu bendigedig

← Arglwydd Iesu, arwain f'enaid

O! fy Iesu bendigedig gan Ebenezer Thomas (Eben Fardd)

Dyma gariad fel y moroedd →

Mynegai Llyfr Emynau y Methodistiaid Calfinaidd a Wesleaidd 1930

212^[1] "Y pethau ni welir sydd dragwyddol."
87. 87. D.

1.O! FY Iesu bendigedig,
Unig gwmni f'enaid gwan,
Ym mhob adfyd a thrallodion
Dal fy ysbryd llesg i'r lan;
A thra'm teflir yma ac acw
Ar anwadal donnau'r byd,
Cymorth rho i ddal fy ngafael
Ynot Ti, sy'r un o hyd.

2 Rhof fy nhroed y fan a fynnwyf
Ar sigledig bethau'r byd,
Ysgwyd mae y tir o danaf,
Darnau'n cwympo i lawr o hyd;
Ond os caf fy nhroed i sengi,
Yn y dymestl fawr a'm chwŷth,
Ar dragwyddol Graig yr Oesoedd,
Dyna fan na sigla byth.

Ebenezer Thomas (Eben Fardd)

Ffynhonnell

1. Emyn rhif 209, Llyfr Emynau y Methodistiaid Calfinaidd a Wesleaidd 1930