Fe roddwn groeso cynnes
I bawb sydd yma 'nghyd,
Cewch gyngerdd da os byddwch
Yn ddistaw ar ei hyd.
Bu trafferth mawr i'n dysgu
Mewn llawen ddawns a chân;
Ond yr ym oll yn fechgyn
A merched bychain glân.
Mae'r cyngerdd 'nawr yn dechrau,
Gwrandewch, bob gradd ac oed,
Cans dyma'r cyngerdd gorau
A fu'n y Llan erioed.
|
[Y Flwyddyn a'i Chwmni-Chwarae i Blant Bach.]
Myfi yw'r Flwyddyn Newydd,
A dof ar ysgafn droed;
Yr wyf yn hen, ac eto
Mor ifanc ag erioed.
|
Yr wyf yn dwyn bendithion
I bawb yn ddiwahan,
Agorwch chwithau'r drysau,
A dof i mewn â chân.
A gyda mi yn dyfod
Mae cwmni bychan tlws,
Sef deuddeng mis y flwyddyn—
Agorwch chwithau'r drws.
|
Daw mis Ionawr yn ei wyn,
Mis yr eira ar y bryn.
[Bwrw eira. Darnau mân o bapur gwyn.]
Daw mis Chwefror ar ei ôl,
Ewch â'r arad maes i'r ddôl.
[Aredig y tir.]
Yna Mawrth a ddaw'n ei wae,
Rhaid rhoi'r oged ar y cae.
[Llyfnu'r tir.]
Yna Ebrill ddaw â'i ddail,
Haul a chawod ar yn ail.
[Agor glawlen.]
|
Daw mis Mai â'i awel fwyn,
Tros ei gilydd naid yr ŵyn.
[Y deuddeg yn rhedeg a neidio.]
Daw Mehefin ar ol hyn
A rhosynnau coch a gwyn.
[Arogli blodau.]
Daw Gorffennaf a'i daranau,
A chwyd ddychryn ar y blodau.
[Dynwared sŵn taranau.]
Daw mis Awst a'i wenith gwyn,
Mae'r medelwyr yn y glyn.
[Dynwared medi.]
Daw mis Medi ar ei ol,
Mae sŵn saethu ar y ddôl.
[Anelu'r dryll.]
Y mae'r Hydref yn neshau—
Dyma'r mis i hela cnau.
[Casglu a thorri cnau.]
Mae mis Tachwedd yma'n awr,
Cwymp y dail i gyd i'r llawr.
[Y deuddeg yn cwympo bob yn un.]
|
Yna daw mis Rhagfyr diddig,
Mis llawenydd y Nadolig.
|
Y dydd cyntaf ydyw'r Sul,
Diwrnod i addoli,
A dyma'r dydd yr awn i gyd
I'r llannau a'r capeli.
Ar ddydd Llun fe'm gwelir i
Yn golchi dillad budron.
Ac ar ddydd Mawrth fe'm gwelir i
Yn smwddio dillad gwynion.
Ar ddydd Mercher byddaf i
Ar doriad gwawr yn corddi.
Ar ddydd Iau fe'm gwelir i
Yn brysur iawn yn pobi.
Ar ddydd Gwener byddaf i
Wrthi yn glanhau y tŷ;
A dywedir mai'r peth nesa'
At dduwioldeb yw glanweithtra.
|
Ar ddydd Sadwrn, yn ddirwgnach,
Af i'r siop yn Llangyfelach.
|
Diwyd ydym ni a difyr,
O fis Ionawr i fis Rhagfyr;
Nid oes ddechrau ar ein gwaith,
Nid oes ddiwedd arno chwaith;
Gwell, yn wir, yw gweithio gormod
Na byw'n ofer mewn segurdod.
|
