Telynegion Maes a Môr/Serch

← Yr Afal Melyn

Telynegion Maes a Môr Telynegion Serch gan Eliseus Williams (Eifion Wyn) Telynegion Serch

Cynnig Calon →

SERCH.

HEDAI dau aderyn
Hwyrol tros y ddaear;
Clywn y naill yn galw,
Galw ar ei gymar —

O, mae serch ym mhopeth
Trwy y cread llydan;
'Châr yr un aderyn
Hedfan wrtho'i hunan.

Hedai'r ddau aderyn
Heibio mewn cymundeb;
Clywn y naill yn galw,
Clywn y llall yn ateb —

O, mae serch ym mhopeth,
Pe bai dyn yn deall;
Unig pob aderyn,
Heb aderyn arall.