Prawfddarllenwyd y dudalen hon
Mae Cymru yn cusanu grudd
Y nefoedd hardd uwch ben,
A'i phlant yn cymdeithasu sydd
A'r wlad tu hwnt i'r llen;
Pan losgo Duw y byd a thân
Fy Ngwalia hoff fo'n Gymru lân.
SHON IFAN Y CYBYDD.
MI wyddoch am Shon Ifan,
Gwn yn siwr.
Sy'n byw yn Fotty Wylan,
Gwn yn siwr.
Mi wyddoch hefyd amcan,—
Ei fod yn werth cryn arian,
Neu fod o'n bur dda allan,
Gwn yn siwr!
Ni chadwai 'i arian adref,
Felly'n wir,
Ond yn Bank Jones y pentref,
Felly'n wir.
Ond holai hwyr a bore,
Am le i gael mwy o loge,
A chododd hwy oddiene,
Felly'n wir!
Fe glywodd gan gydymaith,
Ie'n siwr,
Am le ca'i gymaint deirgwaith,
Ie'n siwr.
Yr oedd o'n hapus wedyn,
A'i het ar dop ei goryn.
Yn disgwyl am ben blwyddyn,
Ie'n siwr!
