Tudalen:Dafydd ap Gwilym Detholiad o'i Farddoniaeth.djvu/11

Ac yno ni'n gogenir,—
I ynnill nef ny llwyn ir.
A chadw i'th gof lyfr Ofydd,
A phaid â gormodd o ffydd.
Ninnau gawn yn y gwinwydd,
Yn neutu'r allt enaid rhydd.
Duw a fyn, difai annerch,
A saint roi pardwn i serch.
Ai gwaeth i ddyn gwiw ei thaid
Yn y llwyn ennill enaid,
Na gwneuthur fal y gwnaetham
Yn Rhufain ac yn Sain Siam?

I Forfudd.

Y FERCH a wnaeth gwayw dan f'ais,
A garaf ac a gerais,
Dy liw a wnaeth Duw Lywydd,
Dy dâl fal llygaid y dydd.
Duw a roddes it ruddaur,
Dy wallt fal tafod o aur.
Dy fwnwgl yn dwf uniawn,
Dy fronnau'n bellennau llawn.
Deurudd ysgarlad arael,
Du Llundain, riain, yw'r ael.
Dy lygaid fel dau loywgae,
Dy drwyn, ar ddyn mwyn y mae.
Dy wên yw'r pum llawenydd,
Dy gorff hardd a'm dwg o'r ffydd,
A'th wenned, fal nith Anna,
A'th liw deg gyda'th lun da.