Cofia gadw'r Sabboth sanctaidd,
Duw fynn gadw hyn yn berffaith;
'R hwn a dreulio'r Sul yn ofer,
Ni wna bris o ddim orchmynner.
Cadw'r Sabbath, ti a'th gene'l,
Yn dy dŷ fel yn y demel;
Gwna i'th dylwyth fyw mor gymwys,
Yn dy dŷ fel yn yr eglwys.
Tri rhyw waith all dyn arferu,
Ar y Sabboth heb droseddu,
Gwaith duwioldeb yn ddiembaid,
Gwaith cariadol, gwaith anghenrhaid.
Gweithred dduwiol yw trafaelu
I dŷ Dduw i'w anrhydeddu,
Ac i wrando'r 'fengyl hyfryd,
Pet fae 'mhell o ffordd oddiwrthyd.
Gwaith cariadawl ydyw cadw,
Dyn a 'nifel rhag eu marw,
A rhoi ymborth iddynt ddigon,
Ac ymgleddu'r bobol weinion.
Gwaith anghenrhaid, 'r hwn nis galli,
Gynt na chwedi'n ei gyflawni,
Megis cadw tŷ heb losgi,
Gwraig wrth esgor, buwch rhag boddi.
Gwachel ddilyn drwg gyfeillach,
Cyfaill drwg sydd wybren afiach,
Plag yn llygru, pyg yn 'nurddo,
'Y dyn duwiolaf a'i dilyno.
