Prawfddarllenwyd y dudalen hon
Y GWYS UNIG
Na, fawr o hwyliau, Gwenno,
Waeth heb na phoeni chwaith,
Os yw oriau'r dydd yn fyrion
Ac oriau'r nos yn faith.
Mae'r cloc yn taro deuddeg
Dos dithau i gysgu, dos.
Na, paid â chau y ffenestr
Na thynnu'r llenni gwyn
Bydd cawod fach o awel
Yn help i frest mor dynn.
Gwen, eist ti byth i gysgu
A'r cloc yn taro un?
Os nad wyt yn fy ymyl,
Gwen bach, nid wyf fy hun.
Mi wn dy fod yn ofni
I'r clefyd droi yn straen.
Nid rhaid i ti bryderu
Dois trwy bob plwc o'r blaen.
Pan glywaf sŵn ticiadau
Yr awrlais ar y bwrdd
Pob tic yn canu ffarwel
Eiliadau oes i ffwrdd,
Pryd hynny bydda'i'n gofyn
Wrth drosi'n ôl a blaen,
Paham mae corff mor egwan
Yn byw dan gymaint straen.
