254[1] Erfyniadau am yr Ysbryd.
76. 76. D.
1 O! YSBRYD sancteiddiolaf,
Anadla arna' i lawr
O'r cariad anchwiliadwy
Sy 'nghalon Iesu mawr;
Trwy haeddiant Oen Calfaria,
Ac yn ei glwyfau rhad,
'R wy'n disgwyl pob rhyw ronyn
O burdeb gan fy Nhad.
2 Tyrd, Ysbryd Glân sancteiddiol,
Anadla'r nefol ddawn:
Gwna heddiw gynnwrf grasol
Mewn esgyrn sychion iawn:
Dy nerthoedd rho i gydfyned
A geiriau pur y nef;
Dy air yn nerthol rheded,
Mewn goruchafiaeth gref.
Pen 1 William Williams, Pantycelyn
Dyfyniad o Golwg ar Deyrnas Crist
Pen 2 Thomas Jones, Dinbych
255[2] Awelon Mynydd Seion.
76. 76. D.
1 O! ARGLWYDD, dyro awel,
A honno'n awel gref,
I godi f'ysbryd egwan
O'r ddaear hyd y nef:
Yr awel sy'n gwasgaru
Y tew gymylau mawr;
Mae f'enaid am ei theimlo:
O'r nefoedd doed i lawr.
2 Awelon mynydd Seion
Sy'n ennyn nefol dân,
Awelon mynydd Seion
A nertha 'nghamre 'mlaen;
Dan awel mynydd Seion
Mi genais beth cyn hyn;
Mi ganaf ronyn eto
Nes cyrraedd Seion fryn.
Dafydd Wiliam, Llandeilo Fach
