yn nghyda helaethrwydd ei lafur, yn gystal âg amser ei ymddangosiad ar faes y diwygiad." Yn y flwyddyn 1896, yr oedd y diweddar Dr. Herber Evans yn treulio Saboth yn ninas Calvin, a dyma a ddywed am yr adeg,—" Nid oedd genyf yr un cydymaith y Sul hwnnw yn Geneva, ar lan y Llyn a'i amgylchoedd paradwysaidd, a'r Alpau draw fel ffrâm euraidd-wen yn cau am y darlun. Wrth edrych yma a thraw, daeth myfyrdod ar ol myfyrdod, am Gibbon yn gorffen yr hanes anfarwol,—am Rousseau a aned yno,—am Byron yn canu am garcharor Chillon,' a ddioddefodd yn y castell draw,—ac am ereill llai enwog a fuont byw ar lannau digyffelyb y Llyn, a'i ddyfroedd glas, dwfn, fel glesni'r ffurfafen. Ond John Calvin, gwasanaethwr y Duw Goruchaf, yr Hwn sydd yn aros yn dragywydd, a'm denodd yno, ac a bregethodd i mi y Sul hwnnw bregeth ddistaw, a ddylanwadodd arnaf byth hyd oni chyfarfyddwn yn y Ddinas Sanctaidd."
