GWLAD EBEN FARDD.
Ardderchog Glynnog lonydd,—achronfawr
Feithrinfa'r brif grefydd;
Allor Duw er's llawer dydd,
Côr di-baid Cred a Bedydd.
CLYNNOG yn Mai! a Mai yn ei ogoniant. I'r sawl a ŵyr am y fangre y mae cyfrol o fwynhad yn gorwedd mewn gair syml fel hyn—Clynnog yn Mai. Ond y mae'n rhaid myn'd yno i sylweddoli'r drychfeddwl. Cawsom y fraint, ac y mae teimlad diolchgar, y "diolch brau " y sonia Edmwnd Prys am dano yn peri i ni eistedd ar lethr bryn uwchben y glasfor i geisio llinellu ychydig—rhyw gwr mantell o ogoniant yr olygfa. Cymerwn ein cenad, ar y dechreu, i ddyweyd gair am y daith. Gadawsom G—— ar nawn Sadwrn, mewn cerbyd cysurus. Daethom yn ebrwydd hyd at bentref tawel Bontnewydd. Canai y fwyalch yn y glaslwyn oddeutu Plas y Bryn, a chwarddai blodau ar ymylon tir Bronant. Rhoddwyd ebran i'r anifail yn Llanwnda, ac yna aethom rhagom i gyfeiriad Coed y Glyn. Gwelem balasdy y Gwylfa, a phreswylfod y seryddwr ar y dde, ac odditanodd ymgodai clochdy pinaclog Llandwrog. Yr oedd teml y goedwig yn degwch bro, yn gyforiog o gân a llawenydd. Yr oedd gwyrddlesni îr ar y dail, a'r castanwydd (chestnut) dan eu coron. Mewn ambell lecyn, gwelid blodau'r drain, botasau y gôg, a haul prydnawn yn llewyrchu arnynt drwy gangau tewfrig. Ar y fynedfa i balas y Glyn, safai y ddau eryr ewinog, bygythiol, ac er mwyn yr adar o bob lliw, diolchem
