Gwirwyd y dudalen hon
Merch i bwy wyt ti, lliw'r manod?
Merch fy nhad a'm mam o briod.
O ba wlad y deuthost allan?
O wlad fy nhad a'm mam fy hunan.
Pan fo seren yn rhagori,
Fe fydd pawb a'i olwg arni;
Pan ddaw unwaith gwmwl drosti,
Ni bydd mwy o sôn amdani.
Perchen tafod a arfero
Ddweud am bawb y peth a fynno,
Bydd rhaid iddo wrando'n fynych
Lawer peth na bo'n ei chwennych.
Hir yw'r ffordd a maith yw'r mynydd
O Gwm Mawddwy i Drawsfynydd;
Ond lle bo 'wyllys mab i fyned,
Fe wêl y rhiw yn oriwaered.
Hawdd yw d'wedyd, "Dacw'r Wyddfa,"
Nid eir drosti ond yn ara';
Hawdd i'r iach, a fo'n ddiddolur,
Beri i'r claf gymeryd cysur.
Bûm yn byw yn gynnil, gynnil,
Aeth un ddafad imi'n ddwyfil;
Bûm yn byw yn afrad, afrad,
Aeth y ddwyfil yn un ddafad.