Yr Arglwydd biau'r ddaear lawr

← Dywed i mi pa ddyn a drig

Yr Arglwydd biau'r ddaear lawr gan Edmwnd Prys

Yr unwedd ag y bref yr hydd →

Mynegai Llyfr Emynau y Methodistiaid Calfinaidd a Wesleaidd 1930

320^[1] SALM XXIV. 1-5, 9, 10.
M.S.

1 YR Arglwydd biau'r ddaear lawr,
A'i llawnder mawr sy'n eiddo;
Yr Arglwydd biau yr holl fyd,
A'r bobl i gyd sydd ynddo.

2 Cans Ef a roes ei sail a'i gwedd
Yn rhyfedd uwch y moroedd,
Ac a'i gosododd hi yn lân,
Yn drigfan uwch llif-ddyfroedd.

3 Pwy yw yr hwn a ddring yn hy
I gysegr fry yr Arglwydd?
A phwy a saif â theilwng wedd
Yng ngorsedd ei sancteiddrwydd ?

4 Dyn â llaw lân a meddwl da,
Ac yn ddidráha'i enaid,
Diorwag, ac ni roes un tro
Er twyllo'i gyfneseifiaid.

5 Fe gaiff hwn gan yr Arglwydd wlith
Ei raslawn fendith helaeth,
Ac iddo bydd cyfiawnder gwiw
Gan Dduw yr iechydwriaeth.

6 Dyrchefwch, byrth, eich pennau'n glau,
Ehengwch, ddorau bythol!
Cans Brenin mawr daw i'ch mewn chwi,
Brenin o fri gogonol.

7 Pwy, meddwch, ydyw'r Brenin hwn,
A gofiwn ei ogoniant?
Iôr lluoedd ydyw, Brenin hedd,
Gogonedd, a phob ffyniant.

Edmwnd Prys

Ffynhonnell

1. Emyn rhif 320, Llyfr Emynau y Methodistiaid Calfinaidd a Wesleaidd 1930