Bro fy Mebyd a Chaniadau Eraill/Gwawr Yfory

Bro fy Mebyd a Chaniadau Eraill

gan Humphrey Jones (Bryfdir)

GWAWR YFORY.

I.

DACW'R hwyr fel cysgod angladd
Dros y bryniau'n dod i'w hynt;
Dacw edn gwan yn ymladd
Am ei fywyd yn y gwynt;
Mae y byd yn newid cywair
Gyda'r hwyr; sawl tant sy'n fud?
Ond mae gwawr yfory'n ddisglair
Ar fy enaid i o hyd.

Nid yw'r ddunos yn pabellu
Ar ffurfafen gobaith gwyn;
Gloewach ydyw gwawr yfory
Po dywyllaf fyddo'r glyn.

II.

Croch yw'r noswynt fel dialedd
Ar ei rawd dros fryniau'r fro;
Rhwyga'r cwmwl fel edafedd,
Dawns ar adfail llawer tô;
Dyma'r caddug wrth dewychu.
Wedi cuddio goleu'r stryd;
Ond mae gwawr yfory'n ddisglair
Ar fy enaid i o hyd.

Cuddio'r agos wrth dywyllu,
Dyna hanes nos y byd;
Dwyn y pell wna gwawr yfory
I agosrwydd claer o hyd.

III.

Ddyfned ydoedd bedd y bwriad
Drengodd yn ei febyd tlws;
Drymed oedd y maen dideimlad
Dreiglodd dichell ar ei ddrws;
Gwelais engyl glân yn gwenu
Ar y maen, dan wg y byd,
A dwyfoldeb gwawr yfory
Digymylau yn eu pryd.

Cysgod angel yn ein dallu
Yw pob trallod gwrddwn ni;
Ar ei adain, gwawr yfory
Ddaw a'i bendith gyda hi.

IV.

Dyma'r flwyddyn yn anadlu
Gweddill ei heiliadau i ffwrdd;
Collwyd tant o gân y teulu,
Cadair wag sydd wrth y bwrdd;
Nid heb obaith af i gysgu,
Os cymylog fu yr hwyr;
Bydd tiriondeb gwawr yfory
Ar fy mreuddwyd, Duw a ŵyr.

Cilio mae y byd gan sangu
Blodau ar ei daith bob cam;
Enfys gain yw gwawr yfory
Ar dymhestloedd tad a mam.

Nodiadau[golygu]