Cân neu Ddwy/Manion

← Ras

Cân neu Ddwy

gan T Rowland Hughes

MANION

EIRA

Mae'n wynnach na'r rhosyn,
Ysgafnach 'i hynt
Na dafnau o ewyn
Ar wyneb y gwynt.
Ond crynu mae'r adar ar glawdd a tho,
Heb un yn barddoni amdano fo.

BUGAIL

Neithiwr trois yng ngolau'r lleuad
Heibio i'r fynwent fach a'i hedd,
Ac mi welwn ryw hen ddafad
Wrthi’n pori ar ei fedd.

AREITHIWR

Llais Twm Penwaig a'i 'stumiau a'i floedd:
Ond 'r oedd penwaig ffres gan Twm, on’d oedd?

NI

Ia, rhai go ryfadd ydyn’ hw', yntê,
Y fo a hi,
A phawb drwy'r stryd ’ma, ac yn wir, drwy'r lle—
Ond chi a fi.

WEDI DARLLEN ADOLYGIAD

Owns o siag, pwys o siwgwr...
Ond pacio nwyd breuddwydiwr
Swydd diclis oedd, daclus ŵr.

WEL, WIR

Breuddwydiodd John Jones iddo siarad ar goedd
Y Seiat am noson gyfan.
A phan ddeffroes, yn y Seiat yr oedd
Yn stwnsian.