Caniadau Barlwydon Llyfr 1/Priodas y Duc of York a'r Dywysoges May

Caniadau Barlwydon Llyfr 1

gan Robert John Davies (Barlwydon)

LLINELLAU
Ar Briodas o Duc York a'r Dywysoges May.^[1]

HAWDDAMOR, Briodas!—
Cyflymed y newydd
O ddinas i ddinas,
O fynydd i fynydd.
Mae Llundain yn dawnsio,—
Llawenydd feddiana
Galonau y miloedd
Rhwng creigiau Gwyllt Walia.
Mae'r Wyddfa yn dyrchu
Ei phen uwch y cymyl,
Ac fel pe yn sisial
Yn nghlustiau yr engyl
Ei bod yn balchio;
Ar Garnedd Llywelyn
Mae awel y nefoedd
Yn chwareu ei thelyn.
Pereidd-nôd dedwyddwch
A llonder a seinia,
A bloedd hyd y wybren
A ddyrch Ynys Mona,—
Ei hadsain chwareua
Yn nghreigiau gwlad Arfon

Er dathlu priodas
Tywysog y Brython.
Beilch drumau Eryri
Daranant y newydd
Yn nghlustiau yr Aran—
Brenhines Meirionydd.
Ar ael Cadair Idris
Y dymhestl ddystawa,
A rhuthrodd y fellten
Yn ol i'w gorphwysfa.
Llyn Tegid a welir
Fel palmant grisialog,
Murmura ei wendon—
"Byw fyddo'r Tywysog."

Nodiadau

↑ Duc York=George Frederick Ernest Albert, (Siôr V) ail fab (ond yr hynaf dal ar dir y byw) Edward Albert, tywysog Cymru.
May=Y dywysoges (brenhines wedyn) Mair o Teck

[1] Duc York=George Frederick Ernest Albert, (Siôr V) ail fab (ond yr hynaf dal ar dir y byw) Edward Albert, tywysog Cymru.
May=Y dywysoges (brenhines wedyn) Mair o Teck

[1]