Caniadau Watcyn Wyn/Ifor Cwmgwys

Caniadau Watcyn Wyn

gan Watkin Hezekiah Williams (Watcyn Wyn)

IFOR CWMGWYS.

Geiriau a gyfansoddwyd erbyn y Gyngherdd a gynaliwyd er budd ei Gof-golofn.

MAE "IFOR" wedi marw, a'i gladdu yn nhir ei wlad,
Ond mae "Cwmgwys" ar dir y byw, fel dalen o barhad.
Mae'r llaw fu'n ysgrifenu englynion yn y glyn,
Ond mae yr awen hi ar ol, yn fyw yn y rhai hyn;
Mae hen linellau hynod ei wyneb yn y gro,
Ond ceidw'r wlad ei englyn ef bob llinell yn ei cho';
Mae "Ifor" wedi marw a'i gladdu yn nhir ei wlad,
Ond sa'i farddoniaeth byth yn fyw yn ddalen o barhad.

Mae ton o gefnfor hiraeth yn chwyddo fel trwy drais,
Ac awel adgof dafla hon i chwalu ar draeth fy llais;
Wrth ddim ond swnio'i enw, mae'r llais yn myn'd yn lleddf,
Mae hen gyweirnod galârgân o fewn y fron yn reddf;
Mae pen yr "Hen John Prydydd" yn isel yn y glyn,
A ninau heb ddim uwch ben ei fedd ond wylo can fel hyn;
Mae "Ifor" wedi marw a'i gladdu yn nhir ei wlad,
Ond sa'i farddoniaeth byth yn fyw yn ddalen o barhad

Nodiadau