Gwaith Gwilym Hiraethog/Pwy, Pwy yw Ef

Gwaith Gwilym Hiraethog

gan William Rees (Gwilym Hiraethog)

golygwyd gan Owen Morgan Edwards

Pwy, Pwy YW EF?

PWY, pwy yw ef sy'n dod i lawr
Trwy euraidd byrth y nef yn awr,
Mewn gallu a gogoniant mawr?
Mae'n bur ei wedd, fel bore wawr;
Mae'n hardd yn wir:
Mae'n dod, mae'n dod, yn nes, yn nes,
Fe wrida 'r nefoedd fel y pres,
Tawdd y cymylau gan ei wres;
Ai melldith ddwg, ai ynte lles?
Genhadwr pur.

Beth, beth sydd ganddo yn ei law?
Ai udgorn yw?—mae'n peri braw!
A ydyw diwedd byd ger llaw?
Ai dedryd olaf natur ddaw
O'i enau ef?
Mae 'n dodi 'r udgorn wrth ei fin,
Gan dynnu anadl iddo 'i hun,
I'w dywallt allan yn gytun
Mewn udgorn floedd, na bu'r fath un
O dan y nef.

Gwrandewch! gwrandewch! holl luoedd
Ac ystyr dithau, ddaear gref,
Ar swn ei lais, a sain ei lef;
Pob gair a ddaw o'i enau ef,
Sy'n bwysig iawn:
Distawrwydd dwfn deyrnasa 'n awr,
Ac astud wrendy nef a llawr,
Y ryfedd genadwri fawr,
Sy'n dod o'i enau, angel gwawr,
Mewn nerthol ddawn.

YR ANGEL.

"Syrthiodd, syrthiodd, Babilon,
I lawr, i lawr, i lawr aeth hon,
Dan farn a gwg yr Iôr;
O'i mawr ogoniant hyrddiwyd hi,
A nerth anfeidrol ruthr cry',
Fel melin faen i'r dyfnder du;
Mae tonnau'r môr
Yn golchi dros ei gwedd;
A llw Iehofa 'n sicrhau
Na chyfyd byth o'i bedd!

"Wel, byddwch lawen, lawen iawn,
Chwi nef y nef yn awr;
Ac unwch chwithau yn y gân
Holl luoedd daear lawr.'

CYDGAN NEF A DAEAR.

"Addolwn, moliannwn, crechwenwn, fe ddaeth
Dydd dial ar Babel, fe'i daliwyd yn gaeth;
Dwrn Duw Hollalluog i'r llawr a'i tarawodd,
Ac anadl ei enau fel brwmstan a'i taniodd.
Haleluiah—y mae ei mŵg yn dyrchafu,
A'i lludw ar aden y corwynt yn chwalu:
Addolwn, moliannwn, crechwenwn, fe ddaeth
Dydd dial ar Babel, fe'i daliwyd yn gaeth."

Nodiadau[golygu]