Gwaith John Thomas/Edrych yn ol

Oddi ar Wicidestun
Jump to navigation Jump to search
Cynhwysiad Gwaith John Thomas

gan John Thomas, Lerpwl
Fy Hynafiaid

Tywysogion y Pulpud Annibynnol.jpg

TYWYSOGION Y PULPUD ANIBYNNOL

Pan oedd J. Thomas yn ei flodau.

(O'r Oriel Gymreig.)

JOHN THOMAS.

———————————————————

I. EDRYCH YN OL.

MAB pum mlwydd a thriugain wyf fi heddyw! Beth sydd yn fwy naturiol nag i mi "edrych fy ffordd yn y glyn," a chofio yr holl ffordd yr arweiniodd yr Arglwydd fi am yr yspaid hir yma? Mae llawer o'm cyfeillion o bryd i bryd wedi bod yn ceisio gennyf osod ar gof a chadw gyda graddau o fanylwch ddigwyddiadau hynotaf fy mywyd, a'r pethau neillduol a ddaethant o dan fy sylw. Nid oes yn fy hanes ddim fydd o fawr ddyddordeb i neb; ond dichon, pe gallwn gael egwyl i ysgrifennu yr amgylchiadau yr arweiniwyd fi drwyddynt, y rhoddai ryw ddyddordeb i'm plant neu fy wyrion i'w darllen, pan y byddaf fi yn isel fy mhen yn y bedd, a'r llaw hon a ysgrifennodd lawer y triugain mlynedd diweddaf yn llonydd yn y gweryd. Os digwydd i mi wrth fy hamdden ysgrifennu yn lled helaeth, a disgyn at lawer o bethau personol yn fy hanes fy hun ac eraill, ymddiriedaf i ddoethineb a barn y neb y disgynna hyn o ysgrif i'w law pa faint o'r cyfryw y rhoddir cyhoeddusrwydd iddynt, os tybir yn werth rhoddi cyhoeddusrwydd i ddim oll.