Hanes Llangeitho a'i hamgylchoedd/Rhagdraith

Hanes Llangeitho a'i hamgylchoedd

gan David Morgan, Llangeitho

RHAGDRAITH.

WRTH gyflwyno y Traethawd hwn i sylw y cyhoedd, dymunem hysbysu mai ar gais lluaws y gwneir felly. Wrth ei gyfansoddi fel Traethawd Cystadleuol, nid oedd ynom yr un bwriad i'w gyhoeddi; ond beiddiwn ddywedyd, oni bai i ni wneuthur felly, aethai llawer o hanes hen Langeitho hynod ar ddifancoll. Yr un pryd, y mae'n ddrwg genym am na buasai rhywun cymhwysach wedi cymeryd y gorchwyl mewn llaw.

Ceir peth o'r hanes, mae yn wir, yn " Methodistiaeth Cymru ," i'r hwn yr ydym yn dra rhwymedig am y cymhorth a gawsom yn nygiad hwn yn mlaen ; ond y mae y llyfr gwerthfawr hwnw allan o gyrhaedd y cyffredin.

Nid ydym, er hyny, mor benfeddal a meddwl nad oes lluaws o wallau yn hwn, y rhai y gall llawer eu gweled heblaw y dysgedig. Derbynied ein cyfeillion, nid gwiw eu henwi, ein diolchgarwch am eu cynorthwy.

D. MORGAN.

Llwynderw,

Llangeitho, Gor. 7fed, 1859 .

Nodiadau