Holl Waith Barddonol Goronwy Owen/Ateb i Gywydd Huw Huws (Y Bardd Coch)
| ← Englynion i Dduw | Holl Waith Barddonol Goronwy Owen gan Goronwy Owen golygwyd gan Isaac Foulkes |
Cywydd y Gwahawdd → |
ATEB, I GYWYDD
HUW HUWS. (y Bardd Coch), o Lwydiarth-Esgob ym Mon, a ganwyd yn Walton yn Lancashire, 1753.
PAHAM i fardd dinam doeth,
Pergerdd, celfyddgar, purgoeth,
Ofyn cân a chynghanedd
Gan ddigrain[1] was main nas medd?
Daw Nef a ŵyr, dyn wyf fi
Dirymiant, Duw'n dwr imi!
Deithryn adyn ydwyf.
Gwae fi o'r sud! alldud wyf.
Pell wyf o wlad fy nhadau,
O'ch son! ac o Fon gu fau;"
Y lle bum yn gware gynt
Mae dynion na'm hadwaenynt;
Cyfaill neu ddau a'm cofiant,
Prin ddau, lle 'r oedd gynau gant;
Dyn didol dinod ydwyf,
Ac i dir Mon estron wyf;
Dieithr i'n hiaith hydriaith hen,
Dieithr i berwawd awen,
Gofidus, gwae fil ydwyf
Wrth son, a hiraethus wyf;
Gan athrist frondrist fraendroch,
Ni chyngan hoyw gân âg och,
Mewn canu namyn cwynaw,
Ni chytgais na llais na llaw.
Pobl anwar Pabyloniaid,
Dreiswyr blin, draws arw blaid,
Ou gwledydd tra dygludynt
Wyr Seion yn gaethion gynt,
Taergoeg oedd eu gwatworgerdd
"Moeswch ac nac oedwch gerdd."
"Gwae ni o'r byd dybryd hwn,"
Cwynent,[2]
"Pa fodd y canwn,
Gerdd Ion mewn tir estronol,
A'n mâd anwylwlad yn ol?
Ni bu, dref sorth, tan orthrech
Fy nhrem am Gaersalem sech;
Os hawdd yr anghofiais hi,
Del ammorth yn dâl imi,
Anhwylied fy neheulaw,
Parlys ar bob drygfys draw,
A'm tafod ffals gwamalsyth,
Ffered yn sych baeled byth.
Llyna ddiwael Israeliad!
Anwyl oedd i hwn ei wlad;
Daear Mon, dir[3] i minau
Yw, o chaf ffun, i'w choffau,
Mawr fy nghwynfan am dani,
Mal Seion yw Mon i mi;
O feinioes ni chaf fwyniant
Heb Fon, er na thôn na thant;
Nid oes trysor a ddorwn,
Na byd da 'n y bywyd hwn,
Na dail llwyn, na dillynion,
Na byw hwy, onibai hon.
Troi yma wnaf, tra myn Ner,
O'm hedfa oni'm hadfer,
Duw Nefol a'm deoles,
Duw'n rhwydd im', a llwydd a lles,
CRIST D'wysog, eneiniog Nef,
Cedrwydd,[4] a'm dyco adref.