Holl Waith Barddonol Goronwy Owen/Ieuan Brydydd Hir
| ← Bonedd a Chyneddfau'r Awen | Holl Waith Barddonol Goronwy Owen gan Goronwy Owen golygwyd gan Isaac Foulkes |
Pedwar Englyn Milwr |
IEUAN BRYDYDD HIR
A brydw's FARWNAD I FFREDRIG TYWYSAWG CYMRU, ac Offeiriad Tregaron a ddywawd, Nad oedd ynddi nac iaith na chynghanedd; am hyny yr heriawdd yr Ieuan ef; a chanu o ORONWY i'r IEUAN fal hyn, 1752.
CWYNFAN o fu o'r cynfyd,
Gan y beirdd ar goegni byd;
Tra fo llên ac awenydd,
A chân fwyn, achwyn a fydd.
Gwyfyn, du elyn dilyth
Awen, yw cenfigen fyth;
Cenfigen ac awenydd
Ym mhob llin, finfin a fydd;
O dwf llawn, dwy efell ynt,
O chredi, dwy chwaer ydynt;
Dwy na wnaed i dynu'n ol,
Dwy ydynt pwy a'u didol?
Ni wneir o fron anaraul
Ond cysgod, er rhod yr Haul,
A diwad ydyw, Ieuan,
Bron sydd na chydfydd â chân.
Wrth Homer wiw, gerddber gynt,
Gwyddost mor eiddig oeddynt;
Hurtaf o ddyn a'i hortiai,
Miwail[1] ei fydr, aml ei fai;
Gwael oedd ei gerdd, pencerdd per,
Os coeliwn Soyl[2] ysceler.
Maro a orug mowrwaith,
Bas y gwyl Bawas[3] y gwaith;
Ni pharchwyd gradd onaddun,
Mawr oedd cas Horas ei hun.
Er Dofydd, pwy'n wr difai
A fu 'rioed, na feiai rai?
Bu gylus gwaith Mab Gwilym,
A'i gerdd gref, agwrdd ei grym.
Pawb a'i cenfydd, o bydd bai,
A bawddyn, er na byddai
A diau, boed gau, bid gwir,
Buan ar fardd y beiir.
E geir, heb law'r offeiriad,
Gan' bron yn dwyn gwŷn a brad,
Milweis eiddig, ma! Suddas,
Heb son am Dregaron gas.
Dos trwy glod, rhagod er hyn,
Heria bob coeg ddihiryn,
A dilyn fyth hyd elawr
O hyd y gelfyddyd fawr.
Od oes wŷr å drygfoes draw,
Afrywiog i'n difriaw;
Cawn yn hwyr, gan eu hwyrion,
Na roes y ddihiroes hon.