Llyfr Del/Sefyll A Dianc

Llyfr Del

gan Owen Morgan Edwards

SEFYLL A DIANC

AETH pump o blant bach ryw ddiwmod am dro,
Y plant bach dedwyddaf o fewn yr holl fro;
Myfanwy a Gwenfron ac Elin fach swil,
A dewr gyda hwynt ydoedd Ioan a Wil.

Gofalai Myfanwy am Elin o hyd,
I Wenfron ei dol oedd holl ofal y byd;
Gofalai'r dewr Ioan am wagen fel dyn,
A Wil a ofalai am dano ei hun.

Wedi cerdded am ennyd hyd ffordd lydan braf,
Dan siarad, a hoffi mwyn awel yr haf;
Mewn ffos oedd ar ymyl y ffordd clywent stwr,
Ac wele ben llyffant yn codi o'r dŵr.

'Roedd llygad y llyfant yn ddisglair ac oer,
Fel llewyrch ar lestr neu lewyrch y lloer;
Rhwng blodau a glaswellt fe welai y plant,
Ac yntau yn dawel yn nyfroedd y nant.

"Hen lyffant," medd Wil. "cyfri'n dannedd wnei di,
A chwilio am garreg i'th daro wnaf fi;"
Ar hyn dyma'r llyffant yn neidio o'r dŵr,
Gan feddwl cael sgwrs â'r plant bychain yn siwr.

Trodd Gwenfron a'r ddol eu cefnau yn chwim.
Am y wagen 'dyw Ioan yn malio'r un dim,
Rhed Myfanwy ac Elin yn rhyfedd eu llun,
A Wil a ofala am dano ei hun.