O! Tyred i'n iacháu

← Bywyd y meirw, tyrd i'n plith

O! Tyred i'n iacháu gan Howell Elvet Lewis (Elfed)

Ni thrig awelon nef →

Mynegai Llyfr Emynau y Methodistiaid Calfinaidd a Wesleaidd 1930

252^[1] Gweddi am Sancteiddiad
65. 65. 66. 65.

1 O! TYRED i'n iacháu,
Garedig Ysbryd;
Tydi sy'n esmwytháu
Blinderau bywyd:
Er dyfned yw y loes,
Er trymed yw y groes,
Dwg ni bob dydd o'n hoes
Yn nes i'r gwynfyd.

2 O! tyred i fywhau
Y rhai drylliedig;
Tydi sy'n cadarnhau
Y gorsen ysig:

Pan fyddo'r storom gref
Yn llanw'r byd a'r nef,
Dy air a'th hyfryd lef
Wna'r gwynt yn ddiddig.

3 O! tyred i'n glanhau
O bob anwiredd,
Rhag cael y drws ynghau,
Pan ddêl y diwedd:
O! gwasgar ofnau'r bedd,
A dwg ni ar dy wedd
I breswylfeydd dy hedd,
Uwchlaw pob llygredd.

Howell Elvet Lewis (Elfed)

Ffynhonnell

1. Emyn rhif 252, Llyfr Emynau y Methodistiaid Calfinaidd a Wesleaidd 1930