Patrymau Gwlad/Wrth y Drws

Patrymau Gwlad

gan Thomas Jacob Thomas (Sarnicol)

WRTH Y DRWS

"Pwy wyt ti?" medd Pedr,
A'r drws yn cil—agor,
"Caradog o Lundain,
Nofelydd—a rhagor."

Paham 'r wyt ti'n galw?"
"'Rwyf am gael trig oesol.
Lle ni bydd un Cymro
A'i gastiau anfoesol."

"Lle ni bydd un Cymro!
Mae yma filiynau,
Tyrd, gwrando am ennyd
Ar sain eu telynau;

"Adweini di'r cywair?"
"Fy mhobl emynyddol,
Mae hi'n Gapel Seion
Fan yma'n dragwyddol!"

"A thi'n un ohonynt!"
"Gwir, ond pe trigiannwn
Yng nghanol y gethern
Ai'r nefoedd yn annwn."

A throes ar ei sawdl
Heb un gair ymhellach,
A ffoi dan dalgwympo
I lawr strim-stram-strellach.

A chlybu'r nefolion
Bell atsain daranllyd,
Sŵn croeso Caradog
I'w loches frwmstanllyd.

Nodiadau