Tan yr Enfys/Cinderella

← Pwca a'r Crydd

Tan yr Enfys gan D J Lewis Jenkins

Y Tri Mochyn Bach →

Cinderella.

I Blant Bach. Mewn Tair Golygfa.

CYMERIADAU: Brenhines, Tywysog, Chwaer Hynaf, Ail Chwaer, Cinderella, Llyswr.

GOLYGFA I: Y Chwaer Hynaf yn edrych arni'i hun mewn drych. Yr Ail Chwaer yn eistedd ar gadair, a Cinderella yn gosod ei slipers am ei thraed. Gwisgir y ddwy chwaer yn barod i'r ddawns. Am Cinderella y mae gwisg lom, a syrth yn hawdd i'r llawr pan gyffyrddir â hi gan wialen Brenhines y Tylwyth Teg. Odditani y mae gwisg brydferth.

Chwaer Hynaf:Credaf fy mod yn barod.

Ail Chwaer:A minnau hefyd.

Cinderella: O! mi garwn innau fynd i'r ddawns heno. Nid teg yw i mi aros gartref i weithio drwy'r dydd heb eiliad i chwarae.

Chwaer Hynaf:I'r ddawns, yn wir!

Ail Chwaer: Beth feddyliai'r Tywysog wrth weld un fel ti yno?

Chwaer Hynaf:Dy le di ydyw gweithio'n y gegin. (Wrth ei Ail Chwaer): Yn awr, gad inni fynd.

[Ar ol eu hymadawiad Cinderella'n dawnsio o amgylch yr ystafell gan ddychmygu ei bod yn y ddawns, ac wedyn eistedd wrth y tân i bendrymu. Brenhines y Tylwyth Teg yn dod i mewn. Cinderella yn ofnus.]

Brenhines: Peidiwch ag ofni, eneth dlos. Eich cyfaill gorau sydd yma i roddi i chwi eich dymuniad. Medraf wneuthur popeth. Dau beth a roddaf i chwi. Ceisiwch a chwi a gewch.

Cinderella: O! Frenhines hardd, garedig! Y cyntaf peth a gâr geneth fach yw gwisg brydferth, dlos.

Brenhines: Un, dau, tri (yn ei chyffwrdd â'i gwialen). Pa beth a welaf i? (Syrth ei gwisg lom.) Beth sydd nesaf?

Cinderella: Cerbyd hardd a cheffylau byw i'm cludo i'r ddawns.

Brenhines: Un, dau, tri. Drwy'r ffenestr edrychwch chwi.

Cindrella (yn curo'i dwylo): O'r fath gerbyd hardd a welaf yn yr ardd. (Yn edrych ar ei thraed): Ond O!'r fath esgidiau gwael! Pa beth a wnaf?

Brenhines (yn dangos dwy sliper): Gwelwch yma ddwy sliper. Ond cyn eu gwisgo mi garwn ddywedyd bod gennych rywbeth i'w wneuthur. Os

yn y ddawns yr arhoswch chwi am un funud wedi deuddeg, syrth y cwbl oddiwrthych. Unwaith eto y dywedaf, gwyliwch heno rhag clywed y cloc yn taro deuddeg.

Cinderella: O! Frenhines, hynny a wnaf.

Brenhines: Ffarwel, fy nghariad (yn ei chusanu). O, fy ngeneth fach, dlos.

Cinderella: Ffarwel, nid anghofiaf fyth y fath garedigrwydd.

[LLEN.]

GOLYGFA II: Y ddawns. Gellir defnyddio unrhyw ddawns y mae'r plant yn ei gwybod. Cinderella yn dod i mewn ar ddiwedd y ddawns. Gwelir hi gan y Tywysog.

Tywysog: O! fy ngeneth brydferth, dlos! A gaf i ddawnsio gyda chwi?

Cinderella: Pleser mawr i mi a fydd hynny.

[Dawnsiant unwaith eto.]

Tywysog:

 
O, Dywysoges fechan, dlos,
Tlysach ydych chwi na rhos;
Ysgafn ydych ar eich troed,
A garech chwi ddawns arall?

Cinderella: Carwn yn fawr. (Clywir y cloc yn dechreu taro deuddeg.) O'r annwyl! O's bosib ei bod yn ddeuddeg?

Tywysog: Ydyw, yn wir. Ond pa wahaniaeth? Gadewch inni ddawnsio.

Cinderella: Na, na; ni allaf. (Yn rhedeg allan pan yw'r cloc yn gorffen taro.)

Tywysog: O! pam y ciliodd i ffwrdd? Ni welais erioed eneth fwy swynol. Hoffais hi'n fawr.

Llyswr (yn dod i mewn â sliper): Dy anrhydedd! Cefais hon ar y grisiau.

Tywysog: Sliper y dywysoges yw. (Yn siarad yn eglur.) Cyhoeddwch hwn i'r lluoedd:

"Pwy bynnag a fedr wisgo hon
A fydd i mi yn wraig."

[LLEN.]

GOLYGFA III:

Chwaer Hynaf (yn hunanol): Pan fyddaf yn wraig i'r Tywysog, ti gei ddyfod i'r plâs ambell dro.

Ail Chwaer: O, yn wir! Nid ti a fydd yno, ond fy nhroed i sy'n taro'r sliper.

Chwaer Hynaf:Dy droed di! O!'r fath droed! Haws a fyddai gosod fy mhen i mewn.

Ail Chwaer: Nid rhaid iti fod mor gâs. Nid wyf am siarad dim yn rhagor.

Chwaer Hynaf:Ust! Ust! Y mae'r Tywysog ei hun yn dod.

[Gŵr y llys yn dod i mewn gan gludo'r sliper o flaen y Tywysog.]

Llyswr: Eich Anrhydeddus Dywysog!

Ail Chwaer: Yn awr, ni a gawn weld.

Tywysog: A fyddwch chwi mor garedig a cheisio gwisgo'r sliper?

Chwaer Hynaf: Gyda'r pleser mwyaf, mi a'i gwisgaf. (Yn gwneuthur pob ymgais i wthio'i throed i mewn.) Mae fy nhroed yn ei tharo i'r dim.

Tywysog: Esgusodwch fi. Mae eich troed yn rhy fawr iddi.

Ail Chwaer: A gaf i ei gwisgo? (Yn gwthio'i throed i mewn.) I mi y mae fel maneg.

Tywysog (yn gwenu): Ofnaf ei bod yn rhy fawr A oes geneth arall yn byw yma?

Chwaer Hynaf: Cinderella'n y gegin syr, ond nid da i'n Tywysog ei gweld hi.

Tywysog: Carem ei gweld.

Ail Chwaer: Nid yw yn ddigon glân i lygaid ein Hanrhydeddus Dywysog ei gweld.

Tywysog: Rhaid i mi ei gweld.

[Gelwir Cinderella gan y chwaer hynaf-yn dod i mewn.]

Tywysog:

O!'r fath wyneb hardd,
Nid dieithr i mi yw,
Ond ble y gwelais ni wn;
A garech chwi dreio'r sliper?

Cinderella: Carwn yn fawr. (Yn ei gwisgo.) Dyna hi-a thyma'r llall!

Tywysog: Fy nhywysoges serchog! A gaiff y dydd hwn fod yn ddydd ein priodas?

Cinderella: Caiff. Eich hapus wraig a fyddaf i. Tywysog: I'r plâs yn awr nyni a awn.

[Ant allan i ganol banllefau'r bobl.]

[LLEN.]