"Ni wn i ddim yn iawn, syr. Rhywbeth fel y gallwn ddechrau ennill ar unwaith heb orfod talu dim."
Meddyliodd Mr. Morus am dipyn.
"A hoffech ddysgu bod yn siopwr,—mewn siop ddillad?"
"Buaswn i yn eithaf bodlon gwneud hynny," ebe Eric, heb frwdfrydedd.
Cofiwch y bydd yn rhaid ichwi ddechrau ar y gwaelod, ar ffon isaf yr ysgol,—ond y mae digon o le oddi yno i'r ffon uchaf."
Gwenodd Eric yn wannaidd.
Bydd yn rhaid ichwi fod yn was bach i bawb am dipyn. Cofiwch hynny."
"Mi dreiaf fy ngorau, syr, i wneud fy ngwaith yn iawn ac i ddioddef pethau pan na fyddaf yn eu hoffi, ac efallai na fydd yn rhaid imi fod yn was bach yn hir."
"Da, machgen i! Os oes gennych ddigon o benderfyniad a thipyn o allu, fe ddewch ymlaen. Mi dreiaf am le ichwi yn Siop Hywel. Y mae Mr. Hywel a minnau'n ffrindiau."
Diolch yn fawr, syr."
"Bydd yn well ichwi gael lle yn Llanilin i ddechrau, er mwyn ichwi fedru mynd adref bob nos, i fod yn gwmni i'r lleill."
