Prawfddarllenwyd y dudalen hon
Dinodedd a Mawredd gofleidiant
Ei gilydd ar drothwy y ne',
Heb chwennych y clodydd a haeddant,
Y llwybrau a gadwant eu lle;
Daw'r hen olygfeydd yn newyddion
Yn llewych atgofion yn awr,
A thybiaf y gwelaf angylion
Yn dangos cyfeiriad y wawr.
Bûm neithiwr wrth wely gŵr difrad
Wynebodd dreialon trwy'i oes;
Ond cerddodd yng nghamre ei Geidwad,
A'i ysgwydd yn friw dan y groes;
Trwy'i gystudd canfyddai y nefoedd
Mor ddisglair a gobaith y sant;
Gŵyr yntau am lwybrau'r Mynyddoedd
Er treulio ei oes yn y pant.
