BLWYDD YN LLADD DWYFLWYDD
YSTYRIAIS mewn dystawrwydd—rhyfeddais
Wirfoddawl ffyrnigrwydd
Llyffant anwar, bleiddgar, blwydd,
Dieflig, yn lladd y dwyflwydd.
HEN WR GWEDDW
YN PRIODI MERCH IEUANC.
Yn ffyddlon rhodd Siôn ei serch—ar Feti,
Gwir fater o draserch;
A rhoddodd Huw Siôn Rhydderch
I Siôn, yn foddlon, ei ferch.
BWLCH OERDDRWS
Bwlch OERDDRWS serth, gerth o'i go'—lle uchel,
Heb un lloches ynddo,
Ar hin oerllyd, drymllyd dro,
Tristwch geir wrth fyn'd trosto.
YR HAF
Fe ddaeth yr haf braf ger bron—er llesiant
I'r llysiau a'r meillion;
Cryfhau'r eginau gweinion
Mewn pryd mae'r hin hyfryd hon.
BYRDRA OES
Mal chwedl mae'r holl genedloedd—trwy waeledd,
Yn treulio'u blyneddoedd;
Ymryson myn'd mae'r oesoedd—yn brysur
Heibio, 'run fesur a byrion fisoedd.
