drigo. Ond ni fynnit mo'th alw wrth henw dy wlad, na'th farnu yn ôl dy waith.
Cigf. Ni fynnai o'm bodd mo'm galw felly.
Er. Gwêl, ac edrych ar y golomen ymma, nid gwaeth ganthi hi pa fodd y gelwir hi, canys mwyn ac arafaidd yw.
Cigf. Nid colomen wyfi, ond Cigfran. Ac fo ordeiniwyd i bob aderyn ei liw ai lûn ai lais ei hun; ac os gofynni di i mi, Pam? Minnau a ofynnaf i tithau, O Eryr, Pam nad wyti cyn lleied ar dryw bâch, neu'r wenfol.
Er. Ond gwrando, Gigfran, pa newydd yr wyti yn i ddwyn ar ôl dy holl hedeg dros y gwledydd?
Cigf. Rwi'n gweled mai gwych yw bod yn gyfrwys pa le bynnag y bwyf.
Col. Nid yw dy gyfrwystra di ond ffolineb, canys ni fedri ac ni fynni ddyfod yn ol at Noah.
Cigf. Gwêl, O! Eryr frenin, fel y mae'r Golomen o'th flaen di yn fy marnu i.
Col. Nid wyfi ond dywedyd y gwir am danat ti, ac fe fyn y gwir o'r diwedd ei le.
Er. Ond dangos di, O! aderyn du, i'th gyfiawnhau dy hun, Pa gyfrwystra sydd ynoti mwy nag mewn aderyn arall ?
Cigf. Mi fedraf droi gyda phob gwynt, ac arogli fy mwyd o bell, a gochelyd y saethyddion. Ni ddescynnaf yn agos i neb heb fy llygad yn fy mhen. Pa opiniwn bynnag a fo gan yr uchelwyr, mi fedraf i lyngcu, am y caffwyf lonyddwch yn fy nyth.
Er. Oni fedr y Golomen hynny hefyd?
Cigf. Crawcc. Mae rhai o'r proffeswyr newyddion ymma mor wangcus a minnau, ac mor gyfrwys am y byd ar gigfran dduaf. Ond os troi'r ddalen a darllain y tu arall i'r gwir, mae llawer o'r dynion newyddion ymma heb ganddynt bris am y byd, nag am danynt eu hunain, nag am ddim, am y caffont fod gyda Noah yn yr Arch, mewn cymdeithas yn yspryd yr ail Adda; ac ni adwaen i yr un o honom ni, y Cigfrain, o'r meddwl hwnnw.
Col. Gwir y mae'r Gigfran yn i ddywedyd yn hyn, canys mae llawer a lliw colomennod arnynt, a natur-
