Gwirwyd y dudalen hon
"Pryd y medrwch chi ddwad yma?"
"Pryd y mynnoch," ebe hi.
"Wel," ebe Enoc, "mi liciwn i chi ddwad ar unwaith, achos, â dweud y gwir i chi, 'does gen i neb yma yrwan, ac mae'r tŷ yn heltar sgeltar. Fedrwch chi ddwad yma yn y bore?"
"Mi ddof yma heno, naw o'r gloch, os caf," ebe'r ferch ifanc.
"Gore oll. Beth ydi'ch enw chi?" gofynnai Enoc.
"Miss Bifan ydi f'enw i," ebe hi.
"O'r gore, Miss Bifan, mi fyddwch yma erbyn naw ynte," ebe Enoc.. Ac felly terfynodd y cytundeb, a phan oedd Enoc yn agor y drws i Miss Bifan fynd allan, gwelai Kit, morwyn Tŷ'n yr Ardd, yn cyfeirio tuag ato gyda nodyn yn ei llaw! A oedd rhyw ysbryd wedi sisial yng nghlust Miss Trefor fod iddi hi yn awr gydymgeisydd?
