Gwrid y Machlud/Y Machlud

Gwrid y Machlud

gan Richard Jones (Ap Alun Mabon)

IV
CERDDI AR GYNGHANEDD

Y MACHLUD

Y MACHLUD tawel sydd ar orwelion,
A marw y dydd a'i ddedwydd freuddwydion;
I minnau darfu mwynion—oriau'r coed,
Ba les yr oed a roed i gariadon?

Awr caru mwyniant, hwyr caru mynydd,
Mynd i dawelwch mwyn hyd y dolydd,
Onid oedd poenau y dydd,—a'i niwl trwch
Yn cau ei dristwch ar harddwch hirddydd.

Heno y niwloedd ar y panylau,
A'r hiraeth ddug y grug o'r hen greigiau,
Yn dweud i'r gaeaf wywo yr hafau
Ieuanc a luniodd dau'n eu calonnau;
Ymhenyd gwybûm innau—golli swyn
Awel o'r brwyn a'r haul o'r bryniau.

Ennyd o chwerthin yw serch a'i winoedd,
A marw yn ifanc ym more'i nefoedd;
Ddoe'n olau, heddiw niwloedd—oer yn hel,
Ar orwel tawel yw rhodiad deuoedd.

Nodiadau[golygu]