Telyn Dyfi/Wrth loew ffrwd Siloam lyn

Telyn Dyfi

gan Daniel Silvan Evans

II

WRTH LOEW FFRWD SILOAM LYN.

WRTH loew ffrwd Siloam Lyn
Mor brydferth tyf y lili!
Mor ber mae gwlithog rosyn glyn
Teg Saron yn arogli!

Mor hardd ar lethri Lebanon
Y chwyf y cedrwydd tirfion!
Mor deg o gylch Iorddonen don
Y taen y palmwydd gwyrddion!

Na hwynt, er hyn, mwy hardd yw'r traed
Sy'n rhodio ffyrdd tangnefedd;
A'r galon bur, er cig a gwaed,
A lŷn wrth lwybrau rhinwedd.

Edwina'r lili yn y glyn,
Diflanna gwrid y rhosyn;
Crin palm- a chedr-wydd dôl a bryn,
A threnga glesni'r dyffryn:

Ond sawl ym more mwyn ei ddydd
A gofia ei Greawdydd,
Ei ddalen ef yn irlas fydd,
Nis gwywa hi'n dragywydd:

Blodeua yng nghynteddoedd Duw,
Dwg ffrwyth toreithiog beunydd;
Yn llewyrch heulwen nef mae'n byw,
Aiff rhagddo byth ar gynnydd.

Nodiadau