Gwirwyd y dudalen hon
Y BEDD
HYD yno'r awn dan y rhod—yn llu dall
Gan wyll dwfn, diddarfod;
Hen geubwll lle paid gwybod,
Ceulan y byw, llynclyn bod.
MOLIANT.
LLE bo llonder aderyn—a lliw Mai
A llam oen ar lasfryn,
Fe glyw Iôr, uwch twrf y glyn,
Fawl Ei dawel flodeuyn.
YR YWEN
FEL nos rhwng coed yn oedi—y saif hon
A'r dwysaf faes dani.
Mae cwsg y bedd i'w hedd hi,
A'i gaddug yn frig iddi.
Y GORWEL
WELE rith fel ymyl rhod—o'n cwmpas,
Campwaith dewin hynod;
Hen linell bell nad yw'n bod,
Hen derfyn nad yw'n darfod.
