66 BEDD Y DYN TYLAWD. Is yr ywen ddu ganghenog Twmpath gwyrddlas gwyd ei ben, Fel i dderbyn o goronog Addurniadau gwlith y nen ; Llawer troed yn anystyriol Yn ei fathru'n fynych gawd, Gan ysigo'i laswellt siriol, Dyna fedd y Dyn Tylawd. Swyddwyr cyflog gweithdy'r undeb, A'i hebryngodd ef i'w fedd, Wrth droi'r briddell ar ei wyneb, Nid oedd deigryn ar un wedd ; ' Nol hir frwydro a thrafferthion, Daeth i ben ei ingol rawd : Noddfa dawel rhag anghenion, Ydyw bedd y Dyn Tylawd. Mae'r gareg arw a'r ddwy lythyren , Dorodd rhyw anghelfydd law, Gyd-chwareuai âg e'n fachgen, Wedi hollti'n ddwy gerllaw ; A phan ddelo Sul y Blodau, Nid oes yno gar na brawd, Yn rhoi gwyrdd- ddail a phwysïau Ar lwm fedd y Dyn Tylawd. Ar sedd fynor nid yw'r Awen Yn galaru uwch ei lwch, A chyn hir drwy'r las dywarchen Aradr amser dyna'i swch ; Un â'r llawr fydd yr orphwysfa, Angof drosti dyn ei hawd ; Ond er hynny angel wylia, Ddaear bedd y Dyn Tylawd . IOAN EMLYN.
