Tudalen:Prif Emynwyr Cymru.pdf/100

Ni welwn yn y 'Sgrythyr orchmynion eglur iawn,
Am beidio ieuo â'r digred, rai diriaid heb ddim dawn;
Y rheol hon dilynwn, a rhodiwn yn ei hol,
Gochelwn gyfeiliornu wrth ddilyn ffansi ffol.

Am hyny, pwy ymyrai yn fawr am bethau'r byd,
Na thegwch ond fo gweddaidd, can's gwagedd ynt i gyd;
Dyledswydd holl blant Sion, rhag ofn troion traws,
Yw 'morol am gymharon rai union o'r un naws;
Dyledswydd gwir Gristnogion yn ddoethion ac yn dde,
Yw atal trachwant cnawdol, gelynol, gael ei le;
A mynd at Dduw o ddifri i ymgynghori'n gall,
Rhag iddynt gael eu temtio i ieuo â phlant y fall.

Ymddengys fod Dafydd Jones yn cymdeithasu llawer â'i Dduw, a gwyddai fwy na'r cyffredin o grefyddwyr ei oes am orfoledd crefydd, oblegid cân bob amser ar yr uchelfannau. Dyn prysur, glân ei galon a thawel ei gydwybod ydoedd, yn byw yn yr awyr agored, ac ni allai ganu'n lleddf. Nid oes ganddo un emyn a chŵyn neu brudd-der ynddo; eithr y mae ei ganu i gyd yn gyforiog o nodau llon a hyderus. Pa mor wych bynnag ydyw'r cyfieithiadau, credaf bod yr emynau gwreiddiol yn rhagori arnynt. Parhant i ddifyrru'r pererinion â'r difyrrwch. sydd yng ngwydd y Brenin. Nid oes i Dafydd Jones, o Gaio, safle fel bardd ond ym myd yr emyn, eithr yn y byd hwnnw ni ragora llawer arno. Pantycelyn, yn ddiau, sydd ar y blaen, a Morgan Rhys a Dafydd William yn cadw golwg arno, ac y mae Dafydd Jones ar eu cyfyl hwythau. Dywed y Dr. Thomas Rees y dylid rhestru Dafydd Jones yn nesaf at William Williams;^[1] eithr nid. ydyw'n ddiogel dibynnu ar farn Dr. Rees, am emyn beth bynnag am ffeithiau hanes, oblegid dywed ef beth cyffelyb am Thomas Williams, Bethesda'r Fro.^[2] Yn ol

1. Hist. Prot. Non. in Wales, p. 402.
2. Gweithiau Prydyddol y Parch. Thomas Williams, Bethesda, y Fro, yn nghyd a Hanes ei Fywyd, Y Parch. Thomas Rees, D.D.